【荃灣綫換信號系統工程，點止「換系統」咁簡單？】#港鐵#信號系統

Video Description

望穿秋水，港鐵荃灣綫新信號系統經過2019年中環試車事故後嘅重重難關，終於在今日正式投入服務，取代自 1996 年沿用至今、設備老化的舊系統。今日我同阿 Mark 來到尖沙咀站，同港鐵代表實地了解運作情況。我成日都講，基建系統必須與時並進。今次換系統之所以重要，係因為可以舒緩到困擾鐵路多年嘅技術與管理痛點。 1️⃣ 告別路軌多硬件時代 以前荃灣綫Analog訊號系統，由地面輸送訊息去推動行車，地面軌旁周圍都係硬件，而依家新系統係行「以通訊為本列車控制」（CBTC），用無線電技術，以WIFI或者5G通訊，地面硬件減少好多。 其實以前西鐵綫已經率先採用 CBTC 第一代系統，但系統依賴軌道間嘅電纜傳輸信號，而軌道嘅震動又令電䌫容易出問題，搞到好頻繁咁出現信號故障。今次荃灣綫採用嘅係CBTC 第二代系統，最大嘅轉變是實現全面無線化，可以大幅減少軌道旁硬件設備，少個香爐少隻鬼，正如東鐵綫同南港島綫(都係CBTC 第二代）嘅經驗，硬件愈少，故障機會自然愈低。更重要嘅係，新一代工程師都唔識得搞舊系統代碼，換上現代化系統就可以解決技術斷層問題。 對於更換所有舊信號系統，其實政府一直想香港行前一步。今天全球通用嘅新一代CBTC 「標準」系統,發生事故都係得「主系統」跳「副系統」，但嗰陣時政府就想研究點樣可以再跳去一個更穩定嘅「特別系統」，加多重保障，若副系統都出事，再跳去個「後備」系統。只不過，香港鐵路軟件呢 20 年嚟一直被幾間外國公司（好似泰雷茲、西門子）壟斷。佢哋啲「標準系統」大生意遍布全球，香港嘅特別需求佢哋接咗單但唔能夠包生仔，攪到係 2019 年中環試車事故，所以當時我強烈建議港鐵用返穩定嘅「標準餐牌」，即係等多咗5年，重新寫過，今日荃灣綫先啓用到。 2️⃣單軌雙行，壞車都唔使停 呢點係我最睇重嘅。以前一條軌定咗只可以行一個方向，如果有一段路壞咗，全條綫就癱瘓。新系統喺技術上就可以做得到「單軌雙行」。例如如果尖沙咀到佐敦段路軌硬件出咗事，只要利用兩個站之前個「波口」（轉綫位），新系統就可以即時調度，將兩站之間冇事嘅另一條路軌變做雙程路。雖然咁樣行法班次實會慢咗，但起碼大家唔使被逼落車轉接駁巴士，或者兜大圈轉其他綫。對於趕時間嘅乘客嚟講，有得行總好過全綫癱瘓。 當然，港鐵例牌都有話要視乎實際情況，要考慮埋乘客安全同埋當時嘅車流需求。但我同阿 Mark 會繼續監察港鐵，希望佢哋喺系統支援到嘅前提下，將「癱瘓式」停運減到最少，唔好空有技術但唔去用！ 大家可能都知，港鐵揀喺禮拜日試新信號，係因為人流少啲，萬一真係出事，對大家返工返學嘅影響都細啲。但我心入面一直有個疑問，今日有機會直接問佢哋，今日班次行 3 分鐘一班，但係聽日高峰時段就行 2 分鐘一班，橫掂都係做測試，點解唔做正真嘅壓力測試，趁今日試埋平日嗰種高密度壓力？得到嘅解釋係一直傳統都係咁做！我覺得港鐵絕對唔可以為咗慳工夫或者驚出事，就略過呢啲測試。另外一個測試重點係2分鐘一班嘅時候，列車停車位置同幕門對口嘅位置係咪對得齊？呢個都係「見真章」嘅重點，可惜今日未能實測，希望剩返嗰三條線（港島線 ，將軍澳綫，觀塘線）嘅工程進度，到時可以跟我哋嘅建議盡量測試，星期日都用返平日嘅時間表。