#TF【#18區搵食 紅磡必食貴價車仔麵  三餸$102食得過？】街坊價酒店級西餐｜淨飲餐湯都知有料到｜實試人氣個性車仔麵店｜即叫即燒叉燒串｜$33足料外賣糖水｜超動L開心果梳乎厘｜#廣東話

Video Description

好耐冇同大家去搵食啦，今次嚟到紅磡美食天堂！搵咗4間餐廳，有人氣車仔麵店、街坊小店、糖水鋪同甜品店，食到後輩大叫投降，想知我哋去邊幾間餐廳？快啲睇埋落去啦～     第一間嚟到意屋，佢係一間街坊小店。餐牌有唔少大廚推介套餐，叫咗香辣番茄大蝦意粉，估唔到個茄醬咁出色，每條意粉沾滿酸甜茄醬，有5隻新鮮大蝦，食得出唔係雪藏貨，蝦肉彈牙，拍得住酒店水準！最驚喜係佢嘅餐湯，平時嘅粟米湯都係得幾粒粟米，但呢度嘅餐湯係將粟米打成蓉咁，雖然食唔到原粒粟米，但成碗湯都係粟米香甜味道，真係好好飲！仲試埋蜜糖芥末煙肉薯條，$35份量超多！煙肉鹹香，薯條唔係空心，食到最後仲有好多煙肉。     第二間係紅磡區內最出名、最貴嘅排隊車仔麵店，不論你係PolyU嘅學生定係街坊，甚至好多街外客，都一定聽過佢個大名。蒙麵向來係一間個性小店，佢哋對自己嘅出品好有信心，呢度全部餸、湯底同粉麵，全部逐樣計錢，3餸起計，貴係貴咗啲，不過食物質素又真係值呢個價！  必食配料：新鮮花甲，冇沙，花甲鮮甜；辣汁魷魚好爽彈，辣汁有料，愈食愈過癮；至於多春魚好香脆，一啲腥味都冇！麵底揀咗銀針粉，配埋個特濃番茄薯仔湯，又幾夾喎！仲有每枱必食嘅招牌蜜汁叉燒串，坐底就要落單，原因係即叫即燒，預咗要等一陣，仲要不設加單。每嚿叉燒表面燒至焦脆，叉燒中間帶啲肥膏，被蜜汁包住好香口。3餸麵$102，加埋叉燒，埋單$136，可以接受。     之後去同一條街嘅萬華糖水店，呢度專做外賣糖水，20幾蚊就有交易。揀咗粉粿綜合凍，配料有芋圓、粉粿、仙草凍、抹茶凍、紅豆、綠豆同珍珠，咁足料都只係$33，性價比超高。粉粿煙韌，仙草凍同抹茶凍好滑溜，加埋芋圓同珍珠，一啖入口好滿足。     最後繼續食甜嘢，嚟到南山梳乎厘，由深水埗開到嚟紅磡！梳乎厘口味好多，叫咗大熱嘅開心果味，面層有大量嘅開心果碎，配埋開心果奶蓋，開心果味濃郁，梳乎厘蛋味突出，空氣感重，好食！     大家平時去紅磡食開邊幾間餐廳？歡迎留言話我聽^^     意屋  地址：紅磡馬頭圍道88號海青閣地下D號鋪  香辣番茄大蝦意粉 $75（升級套餐：是日餐湯及香草蒜蓉法包+$12）  蜜糖芥末煙肉薯條 $35     蒙麵  地址：紅磡差館里9-15號協輝大廈地下1號鋪  新鮮花甲 $40/份  辣汁魷魚 $17  脆香多春魚 $15  銀針粉 $13  特濃番茄薯仔湯 $17  招牌蜜汁叉燒串 $34/串     萬華糖水店  地址：紅磡差館里17號聚賢大廈地下2C號鋪  粉粿綜合凍 $33     南山梳乎厘  地址：紅磡民泰街19-23號地下1號舖  開心果梳乎厘 $60     主持、撰文：Yvonne Lam  攝影：Peter Li  剪接：Kate 、Peter Li 、Fong Ka Him 美術：Anita Lam     全自費真實食評，內容反映當日質素，並非廣告！最新價格以餐廳為準。     #意粉 #車仔麵 #梳乎厘 #糖水 #開心果梳乎厘 #意屋 #香辣番茄大蝦意粉 #薯條 #蜜糖芥末煙肉薯條 #蒙麵 #叉燒  #番茄薯仔湯 #萬華糖水店 #粉粿 #南山梳乎厘  #街坊小店 #食晏 #外賣 #下午茶 #18區搵食 #紅磡 #紅磡美食 #TalkFood #TalkFood紅磡 影片章節 00:00 Y小編帶大家去紅磡搵食 00:46 第一站：意屋 04:20 第二站：蒙麵 08:04 食完兩個正餐好飽嘅後輩遊花園時間 08:57 第三站：萬華糖水店  11:05 第四站：南山梳乎厘  13:00 小總結