驚天災難！過年路成了黃泉路！40億大橋瞬間變廢鐵，豆腐渣工程再顯神威，下個城市系邊？技術從來唔系問題，問題系人禍，系制度崩壞！心寒到震，激到吐血！#坍塌 #響水月港大橋 #中國橋梁坍塌 #熱門

Video Description

40億變廢鐵！過年路成咗黃泉路！5條人命凍過水，豆腐渣工程背後嘅人禍直頭令人心寒到震啊！ 仲有冇天理嘎！我哋平時食住花生睇新聞，話阿三嗰邊又橋塌又飛機墜毀，好似睇戲咁，仲可以第一時間刷到片。點知自己腳下塊地，塌咗棟成四十億銀紙砌出嚟嘅大橋，成個星期之後，先至好似啲隔夜餿水咁，一滴一滴漏出嚟畀我哋知！呢種對比，真系涼過吹北風，心都寒到結霜啊！ 講緊嘅，就系江蘇鹽城響水嗰條「月港大橋」！嗱，個名幾好聽吖，幾十億揼落去，宣傳片影到天花龍鳳，話系乜嘢「亮麗風景線」！點知呢？過年流流，條「風景線」一嘢就變做「送終線」！成條橋，95米嘅主跨啊，好似條死鯨魚咁，「轟」一聲直插落通榆河度，冚唪唥散哂！現場啲相片睇見都嚇死人，吊車反肚浸喺水度，啲鋼筋鐵支扭到好似麻花，又好似俾巨人徒手撕爛咁，飛到周地都系。話系災難現場？直情系巨型廢鐵屠宰場啊！新鮮滾熱辣，仲識冒煙添！仲話風景？呢啲系地獄入口嘅風景就差唔多！ 最陰功嘅，系橋上面嘅人！二十幾個生勾勾嘅工人師傅，臨過年喇，諗住趕埋手尾，出糧，開開心心返屋企團年。點知，就系咁一瞬間，五條人命，冇喇。真系凍過水，直情繫結咗冰，永世都返唔到屋企食嗰餐團年飯！其中一位師傅，網名叫做「三三哥」，出事前一日，仲喺短視頻度笑咪咪打卡，話自己為響水「添一道風景」。出事前幾個鍾，仲有網友噓寒問暖，問：「三哥辛苦喇，點仲未收爐？」 點知，下晝五點幾，橋一冧，三三哥個賬號，就永遠冇再更新過。而家全網嘅人衝去佢條片下面，瘋狂咁問「有冇事？平安嗎？」。呢種等待，呢種明知凶多吉少嘅追問，真系揦住個心，痛到入骨入肺！一條橋，劏開咗幾個家庭！你話，咁樣叫做「添風景」？呢啲系孽！系血淋淋嘅人禍！ 唔好同我扯咩「極端天氣」啊！有人仲死雞撐飯蓋，話當日大風大雪喎？笑死人咩！第二日鹽城個天藍到似假嘅，風和日麗啊！合條橋咁鬼有靈性，專登揀年廿八，就快收爐人人歸心似箭嘅時候，嚟個自我了斷，當做賀年禮物？明眼人一睇，冧成咁，月港大橋百分之一萬系人禍！ 系直頭擺上檯面，明刀明槍呃錢呃出嚟嘅「豆腐渣工程」！仲洗乜查？瞇埋眼都知咩事啦！ 講起技術？我呸！而家乜嘢年代啊？起條橋啫，仲系用算盤計數咩？電腦BIM模型模擬到啪啪聲，乜嘢受力、承重，計到清清楚楚啦！技術從來都唔系擋箭牌！問題出喺邊呢？出喺班坐喺冷氣房，掛住撈油水、趕政績、偷工減料嘅人身上！我唔同你講咩高大上術語，我就問你：你當條橋系個病人，啱啱做完骨科大手術，駁好骨頭。橋底啲臨時支架，就系病人身上嘅石膏同鋼釘。條橋嘅吊杆系統，即系肌肉同韌帶，根本未生埋、未有力！成個身嘅重量，全靠副石膏頂住。試諗下，你會唔會叫個啱啱駁完骨嘅病人，即刻落床，喺零下幾度嘅雪地，孭住兩包水泥去跑馬拉松啊？咁做，同謀殺有咩分別？ 但班施工嘅「天才」，就系咁樣做囉！佢哋就系當呢個「術後危殆」嘅病人 — 即系條橋 — 系鐵甲萬能俠！喺局部嚴重超載、所有壓力谷埋一邊嘅情況下，照開工！照趕進度！結果？彎矩瞬間爆表，啲臨時支架「咔嚓」一聲斷骨，跟住成副骨牌噼里啪啦咁冧落嚟，條橋嘅「龍骨」就咁散哂！呢啲系咩技術難題啊？呢啲系連地盤學徒都知會死人嘅低級錯誤啊！大佬！基本到呢，直頭系將本建築安全手冊，當廁所紙都用唔上，因為嫌佢硬啊！呢啲唔系無知，系赤裸裸嘅無恥同謀殺啊！ 拆穿呢塊遮羞布，後邊嗰浸建築業嘅妖風，先至真正嚇到你魂飛魄散，由頭皮痲到落腳趾公！ 第一，就系班官老爺同老細「趕工期趕到黐咗線」！年關殺到，為咗張靚靚政績表，為咗可以準時「報喜」，個項目部簡直系癲嘅！兩班倒，24小時唔停手，當班工人系機械人！聽講遲一日完工，罰款十萬！喺呢種癲狗式追趕之下，「安全」兩個字值幾錢斤？直情被揼落垃圾桶，再車多兩錢重壓落去！「進度第一！質量？求求其其啦！」 班工人做到對眼蒙查查，手騰腳震，質檢？邊個得閒跟你規範做啊！咁嘅玩法，條橋唔冧，都對唔住班偷工減料嘅天才啦！ 第二，仲經典過TVB劇集嘅，就系「層層剝皮，以包代管」！四十幾億嘅大項目，掛住「中鐵十二局」個金漆招牌，幾咁威水。點知個項目好似個洋蔥，由總包剝去一包，一包剝去二包，二包再剝去三包……層層抽水，層層卸力！總包簽完個名，收完管理費，拍嚇羅友就走咗去喇！下面啲技術交底、安全監督？關人隱事！最底層班勞務工人，連自己喺度做緊啲乜、有幾牙煙都未必知啊，完全系蒙查查咁拎住條命去搏！一出事？哼，好戲嚟喇！總包話系分包嘅問題，分包話系勞務公司唔跟指引，勞務公司兩手一攤話自己都系打工。個波就咁踢來踢去，踢到去邊？踢咗落通榆河，連影都冇！最後冇人需要負責！班工人嘅命，就系咁樣喺呢場官僚足球賽入邊，變成一粒冇人理嘅塵埃！ 第三，嗰個所謂「監理」，直頭系「擺爛界嘅冠軍」！食碗面反碗底，拎正牌唔做嘢！似吊裝拱梁呢啲超高風險工序，按規矩，監理要好似監犯咁24小時釘喺現場，眼金金睇實每個步驟，驗收合格先可以繼續落去。結果呢？班監理大爺，人影都唔見多隻啊！唔知去咗邊度嘆茶定系打通關？出事之後先施施然補簽文件，當冇事發生過！佢哋唔系嚟監督，系嚟度假同收錢㗎！納稅人啲血汗錢，就系用來養呢班蛀米大蟲！工人嘅安全？喺佢哋眼中，連只蟻都不如！ 講到最離譜嘅，系班監管老爺！事發之後，記者去問。響水縣交通局耍手擰頭：「監管繫上頭交通運輸局安排㗎喎，工程質量？我哋唔清楚喎。」 交通運輸局就耍太極：「等調查，有結果會公布。」 典型嘅官腔，一推二五六，完美卸膊！至於間監理公司「江蘇潤華工程管理有限公司」，原來系慣犯嚟㗎！ 二一年已經試過因為低價中標、造虛假文件被罰過錢！咁嘅公司，居然可以一次又一次咁接政府大工程？合個監管制度系紙紮嘅？定系根本連張紙都冇，得個講字？兒戲到極點啊！呢啲就系我哋信任嘅「有關部門」！ 講到尾，最慘最陰功嘅，永遠都系班喺最前線，用血汗同性命去砌起條橋嘅工人師傅！捱更抵夜，日曬雨淋，食無定時，就係為咗嗰幾千蚊血汗錢，諗住年尾攞足糧，風風光光返鄉下見老婆仔女。點知呢？橋一冧，乜都冇喇！糧？可能都拖埋！命？直頭凍過冰！五個家庭嘅頂梁柱，就咁冇咗。屋企人喊到撕心裂肺，個年點過？以後個日子點過？呢班先至系所謂「基建奇蹟」下面，最堅實、亦系最卑微嘅基石。但最後，佢哋變咗乜嘢？變咗某些人升官發財路上，最廉價、最可以隨意捨棄嘅犧牲品！公平？喺佢哋面前講呢兩個字，都覺得自己個口好臭！ 響水月港大橋，本來承載住附近村民幾多期盼？諗住路通財通，帶嚟發展同方便。點知呢？盼到頸都長，最後盼嚟一個血肉模糊嘅墳場！最令人心噏嘅系，呢單嘢一啲都唔意外，一啲都唔罕見！建築行業入邊，趕工期趕到癲、層層轉包剝到淨底、監理擺爛hea做、監管老爺卸膊，呢四大毒瘤，根本就系計時炸彈，遍布全國！唔知幾時，唔知邊度，又會「嘭」一聲爆多鑊！而每一次爆炸，賠上嘅都唔止系工人嘅鮮血，更加系全國納稅人被浪費嘅天文數字金錢，同埋政府所剩無幾嘅公信力！啲錢，就咁「咚」一聲揼落海，連個水花都睇唔清，真系睇到眼冤，激到嘔血啊！